ඊශ්‍රායල – හමාස් යුද්ධය, මීට දසවසරකට පෙර ISIS වෙතින් පැවැති තර්ජනයට පසු අමෙරිකා එක්සත් ජනපදයට වඩාත්ම බරපතළ ත්‍රස්ත ප්‍රහාර අවදානමක් මතු කරන බව FBI ඔත්තු සේවාවේ අධ්‍යක්ෂ ක්‍රිස්ටෝපර් ව්රේ (Christopher Wray) පවසයි.
එක්සත් ජනපද සෙනේට් මණ්ඩලයේ ස්වදේශීය ආරක්ෂක හා රාජ්‍ය කටයුතු කමිටුව ඉදිරියේ ඔහු මේ බව ප්‍රකාශ කළේ, අමෙරිකා එක්සත් ජනපදයට වර්තමානයේ පවතින ආරක්ෂක අවදානම් පිළිබඳව කරුණු දක්වමිනි.
අමෙරිකානු FBI ඔත්තු සේවාවේ අධ්‍යක්ෂවරයා එහිදී කියා සිටියේ, ගාසා තීරයේ ඊශ්‍රායල – පලස්තීන ගැටුම්ආරම්භ වීමෙන් පසු අමෙරිකානුවන්ට සහ බටහිර වැසියන්ට ප්‍රහාර එල්ල කරන ලෙස විදේශීය ත්‍රස්තවාදී සංවිධාන රැසක් සිය අනුගාමිකයන්ට උපදෙස් ලබාදී ඇති බවය.
එමඟින් අමෙරිකාව තුළින්ම ප්‍රචණ්ඩ අන්තවාදීන් මතුවිය හැකි බවට FBI අධ්‍යක්ෂවරයා අනතුරු අඟවා සිටියේය.
මීට දසවසරකට පෙර ISIS සංවිධානය මැදපෙරදිග ඉස්ලාමීය රාජ්‍යයක් බිහිකිරීමට උත්සාහ දැරූ සමයේදී ත්‍රස්ත ප්‍රහාර සඳහා අනුගාමිකයන් දිරිගැන්වුවාට සමාන බලපෑමක් හමාස් සංවිධානය සහ ඔවුන්ගේ අනුගාමික සංවිධාන දැන් සිදුකරන බව FBI අධ්‍යක්ෂවරයා කියා සිටියේය.
ගාසා සටන් ඇරඹීමත් සමග අමෙරිකා එක්සත් ජනපදයේ යුදෙව්වන්, මුස්ලිම්වරුන් සහ අරාබි – අමෙරිකානුවන්ට එල්ල වන තර්ජන ඉහළ ගොස් ඇති බව අමෙරිකානු රජයේ නිලධාරීන් ප්‍රකාශ කරයි.
FBI අධ්‍යක්ෂවරයා වැඩිදුරටත් කියාසිටියේ, විදේශයන්හි අමෙරිකානු හමුදා කඳවුරු වෙත ඉරානයේ සහාය ලබන සන්නද්ධ කණ්ඩායම් එල්ල කරන ප්‍රහාර සංඛ්‍යාව ද ගත වූ මාසය තුළ ඉහළ ගොස් ඇති බවය.
ගැටුම් තවදුරටත් පැවතුනහොත් අමෙරිකා එක්සත් ජනපදයට ඉරානයෙන් සහ වෙනත් රාජ්‍ය නොවන කණ්ඩායම් වෙතින් එල්ලවන සයිබර් ප්‍රහාර උත්සන්න වීමේ අවදානමක් පවතින බව ඔහු සඳහන් කළේය.
ඊශ්‍රායල – පලස්තීන ගැටුම් ආරම්භවීමෙන් පසු අමෙරිකා එක්සත් ජනපදයේ යුදෙව් ශිෂ්‍යයන් වෛරී තර්ජනවලට ලක්වීම ද ඉහළ ගොස් තිබේ.
අමෙරිකානු විශ්වවිද්‍යාලවල මෙම තත්ත්වය දක්නට ලැබීමත් සමග යුදෙව් ශිෂ්‍ය කණ්ඩායම්වල ආරක්ෂාව තර කිරීමට බලධාරීන් පියවර ගෙන ඇති බව වාර්තා වේ.
මේ අතර ධවල මන්දිරය සංවිධාන කළ පරිගණක වෛරය පිළිබඳ සමුළුවකදී අමෙරිකානු නීතිපති මෙරික් ගාලන්ඩ් කියා සිටියේ, හමාස් සංවිධානයේ මූල්‍ය ප්‍රවාහනයේ මුලාශ්‍ර පිළිබඳව ඊශ්‍රායලය සිදුකරන විමර්ශනවලට සහායවන ලෙස නීතිපති දෙපාර්තමේන්තුවට උපදෙස් දුන් බවය.
එහිදී ක්‍රිප්ටොකරන්සි නැත්නම් අතත්‍ය මුදල් ආකාරයෙන් හමාස් සංවිධානයට මුදල් ලැබෙන්නේ ද යන්න ද පරීක්ෂාවට ලක් වේ.
